Grafísku hönnuðirnir Aron Freyr Heimisson og Einar Guðmundsson reka og eiga verslunina Mikado á Hafnartorgi. Mikado er hönnunarrými og lífstílsverslun með sterka áherslu á japanska og skandinavíska fagurfræði. Verslunin býður gestum að uppgötva úrval af ilmvötnum, húsgögnum, lýsingu og lífsstílsmunum sem hafa sannað sig í gegnum hönnun, efni og handverk og búa yfir einstakri fagurfræði sem hvetur til núvitundar.

„Hugmyndin að því að opna á Hafnartorgi hafði lengi blundað í okkur áður en við tókum skrefið. Við vildum opna rými þar sem við gætum samtvinnað verslun, grafíska hönnun og prent, en við erum einmitt með vinnustofu inn af versluninni. Til að byrja með sáum við þetta fyrir okkur sem litla og kósí vinnustofu þar sem verslun fengi að vera með. Þegar við fluttum svo heim eftir að hafa búið í Portúgal fórum við að skipuleggja þetta betur og af alvöru og þá sáum við fljótt að okkur langaði að taka hugmyndina lengra og opna stærri verslun.“